Կատարը չի կարողանա միակողմանիորեն լրացնել Եվրոպայի գազի կարիքները

Կատարը, որը բնական գազի աշխարհի խոշորագույն արտահանողներից է, չի կարողանա միակողմանիորեն լրացնել Եվրոպայի էներգետիկ կարիքները՝ Ուկրաինայի շուրջ ստեղծված իրավիճակի պատճառով դեֆիցիտի դեպքում, ասել է էներգետիկայի նախարար Սաադ Շերիդ Ալ-Քաաբին, փոխանցում է Reuters-ը։

«ԵՄ-ին անհրաժեշտ գազի քանակը չի կարող որեւէ մեկը միակողմանիորեն լրացնել՝ առանց խաթարելու մատակարարումները աշխարհի այլ տարածաշրջաններ»,- ասվում է նախարար Սաադ Շերիդ Ալ-Քաաբիի հայտարարության մեջ: «Եվրոպայի էներգետիկ անվտանգությունը պահանջում է բազմաթիվ կողմերի հավաքական ջանքեր»։

Քաաբին Դոհայում ԵՄ էներգետիկայի հարցերով հանձնակատար Քադրի Սիմսոնի հետ հանդիպումից հետո հանդես է եկել հայտարարությամբ։

Նա հույս է հայտնել, որ «Եվրոպայում լարվածությունը կարող է կարգավորվել դիվանագիտական ճանապարհով, որպեսզի բոլոր մատակարարները կարողանան միասին աշխատել՝ կարճաժամկետ եւ երկարաժամկետ հեռանկարում էներգետիկ անվտանգություն ապահովելու համար»։

Կատարը ԱՄՆ-ի առանցքային դաշնակիցն է մերձավորարեւելյան տարածաշրջանում եւ ԵՄ-ի առաջատար առեւտրային ու քաղաքական գործընկերը:

Միացյալ Նահանգները մտահոգված է, որ Ռուսաստանը պատրաստվում է ներխուժել Ուկրաինա, եւ վերջին շաբաթներին դիմել է Կատարին ու գազի այլ խոշոր արտադրողների՝ խնդրելով ուսումնասիրել՝ կարող են արդյոք նրանք լրացուցիչ գազ մատակարարել Եվրոպա, եթե ռուսական մատակարարումները խափանվեն:

Մոսկվան բազմիցս հերքել է Ուկրաինայի վրա պատրաստվող «հարձակման» մասին Արեւմուտքի պնդումները: