Moody's-ը բարձրացրել է մետաղների կանխատեսվող գները

Moody's վարկանիշային գործակալությունը վերանայել է մի շարք հիմնական գունավոր մետաղների եւ ոսկու գների իր կանխատեսումը Ռուսաստանի եւ Ուկրաինայի միջեւ հարաբերությունների ճգնաժամի ֆոնին շուկայի բարձր փոփոխականության պատճառով, որը սահմանափակել է հումքի մատակարարումը, փոխանցում է «Ինտերֆաքս»-ը:

«Որոշ մետաղների գները, այդ թվում՝ ալյումինի եւ նիկելի, 2022 թվականի առաջին եռամսյակում ռեկորդային մակարդակի են հասել, պղնձի ու ցինկի գները շարունակում են բարձր մնալ,- նշել է Moody's-ի ավագ փոխնախագահ Բարբարա Մատտոսը:- Այդ ապրանքների առաջարկի եւ պահանջարկի բալանսը արդեն կտրուկ էր դեռ մինչ կոնֆլիկտի բռնկումը, ինչն էլ բարձր էր պահում գները»:

Իր կանխատեսումներում գործակալության վերլուծաբանները ելնում են այն ակնկալիքներից, որ G20-ի երկրների տնտեսություններն այս տարի կաճեն 3.6 տոկոսով, իսկ 2023 թվականին՝ 3 տոկոսով։

Առաջիկա 12 ամսվա համար ալյումինի գնի կանխատեսումը բարձրացվել է մինչեւ 1.3 դոլար մեկ ֆունտի դիմաց՝  նախկինում ակնկալվող 1 դոլարի համեմատ, իսկ միջնաժամկետ կտրվածքով՝ մինչեւ 1-1.3 դոլար ֆունտի դիմաց՝ ֆունտի դիմաց 0.7-1 դոլարի համեմատ:

Պղնձի տարեկան գնահատականը մնացել է 4 դոլար մեկ ֆունտի դիմաց, միջնաժամկետ կտրվածքով` ավելացել է մինչև 3-4 դոլար մեկ ֆունտի դիմաց 2.75-3.5 դոլար ֆունտի դիմաց: Այս մետաղի համաշխարհային մատակարարումների 4 տոկոսը բաժին է ընկնում Ռուսաստանին, ասվում է զեկույցում։

Նիկելի համար 12-ամսյա կանխատեսումային գնանշումը 7.5 դոլարից բարձրացվել է մինչեւ 9 դոլար, մինչդեռ միջնաժամկետ գնահատականը մնացել է ֆունտի դիմաց 5.5-7 դոլարի միջակայքում: Ինդոնեզիայում արտադրական հզորությունները պետք է զգալիորեն ավելանան 2022 թվականի երկրորդ կեսին, ինչը կարող է սահմանափակել գների աճի տեմպերը, կարծում են գործակալության վերլուծաբանները։

Տարվա կտրվածքով ցինկի գնի ակնկալիքները չեն փոխվել՝ 1.3 դոլար ֆունտի դիմաց, միջնաժամկետ կտրվածքով բարձրացվել են մինչեւ 1.1-1.4 դոլար ֆունտի դիմաց՝ ավելի վաղ գրանցված 1-1.3 դոլարի համեմատ:

2022 թվականին ոսկու միջին գնի կանխատեսումն այժմ 1.8 հազար դոլար է կազմում ունցիայի դիմաց՝ ավելի վաղ կանխատեսվող 1.7 հազար դոլարի համեմատ:

«Ընդհանուր առմամբ, 2022 թվականին մետաղագործական եւ հանքարդյունաբերական ընկերությունները կշահեն ապրանքների բարձր գներից եւ շահութաբերությունը պատմական մակարդակից բարձր կպահեն,- ասվում է Moody's-ի հայտարարության մեջ:- Մյուս կողմից, ձգձգվող հակամարտությունն ուղղակիորեն կնվազեցնի արդյունաբերական ակտիվությունը եւ մետաղի ու պողպատի պահանջարկը՝ զսպելով հումքային ապրանքների գների հետագա աճը»: