ԶՊՄԿ-ում մեծարվեցին ընկերության կանայք

Մարտի 8-ից ըստ ամենայնի մեկնարկել է կանանց միամսյակը (մինչև ապրիլի 7-ը) և դրա շրջանակում կլինեն իգական սեռին մեծարելուն միտված միջոցառումներ: Քաջարանի մշակույթի պալատի ճեմասրահում մարտի 11-ին Զանգեզուրի պղնձամոլիբդենային կոմբինատի 35 և ավելի տարիների աշխատանքային փորձ ունեցող կանայք էին, որոնց նվիրումի և ջանասիրության շնորհիվ ընկերությունը շարունակել է անխափան երթը: Ընթերցվեց 45 կանանց անուն, որոնցից յուրաքանչյուրին «Զանգեզուրի ՊՄԿ» ՓԲ ընկերության գլխավոր տնօրեն Ռոման Խուդոլին և  գլխավոր տնօրենի առաջին տեղակալ Վարդան Ջհանյանը շնորհակալագրեր և դրամական պարգևներ հանձնեցին:

Շնորհավորանքի խոսքում Ռ.Խուդոլին ընդգծեց, որ հաճելի մի զգացողությամբ է հանձնում պարգևները կանանց, որոնց մի մասը ծանր ու բարդ աշխատանք է կատարում, տղամարդուն բնորոշ գործառույթներ իրականացնում:

Պարգևատրվող կանանց բարեմաղթանքներ հղեց ընկերության վարչական դեպարտամենտի ղեկավար Զառա Սիանոզովան:

Պարային կատարումով ելույթ ունեցավ մշակույթի պալատի պարուսույց Մելանյա Մարտիրոսյանի սան, եվրոպական տարբեր բեմերում հանդես եկած պարուհի Սառա Ստեփանյանը:

Երաժշտական կատարումներով հանդես եկան մշակույթի պալատի վարիչ, քանոնահար Նառա Մկրտչյանը, դաշնակահար Գոհար Հովհաննիսյանը, ֆլեյտահար Լիլիթ Գրիգորյանը:

Այնուհետև անկեղծ զրույց ծավալվեց աղանդերի սեղանի շուրջ:

Վահրամ Օրբելյան