Հայաստանում կայացավ FINTECH360 միջազգային համաժողովը

Յունիբանկի աջակցությամբ Երևանում անցկացվեց FINTECH360 միջազգային համաժողովը, որը համախմբեց շուրջ 500 մասնակից ավելի քան 30 երկրներից՝ ներառյալ ԱՄՆ-ն, Մեծ Բրիտանիան, Ֆրանսիան, Գերմանիան, Շվեյցարիան, Կիպրոսը, Լատվիան, Լյուքսեմբուրգը, Ռումինիան, ԱՄԷ-ն, Հնդկաստանը, Ռուսաստանը, Բելառուսը, Ղազախստանը, Ղրղըզստանը, Տաջիկստանը, Մոլդովան, Ուզբեկստանը, Վրաստանը և այլն։

Համաժողովն անցկացվեց FINTECH360-ի գլխավոր գործընկեր՝ Յունիբանկի աջակցությամբ:

FINTECH360-ը միավորեց բանկային ոլորտի, վճարային համակարգերի, խոշոր ՏՏ ընկերությունների ղեկավարներին և ստարտափներին՝ քննարկելու ֆինանսական տեխնոլոգիաների զարգացման հիմնական միտումներն ու մարտահրավերները։

Բացման խոսքով հանդես եկան Յունիբանկի վարչության նախագահ Մեսրոպ Հակոբյանը, Հայաստանում ՄԱԿ-ի մշտական համակարգող Ֆրանսուազ Ժակոբը, ՀՀ Կենտրոնական բանկի նախագահի տեղակալ Հովհաննես Խաչատրյանը, Հայաստանի բանկերի միության նախագահ Դանիել Ազատյանը, MCC ICF վկայագրված քոուչ Սաբրինա Մոմինը և FinTech Armenia-ի հիմնադիր Ստեֆան Լուկասը։

FINTECH360 համաժողովը ևս մեկ անգամ հաստատեց իր կարևոր դերը՝ որպես միջազգային հարթակ ֆինանսական տեխնոլոգիաների ոլորտում փորձի փոխանակման և երկխոսության համար։ Համաժողովի օրակարգի հիմնական թեմաներն էին՝

• հաճախորդի փորձը ֆինտեխում և տեխնոլոգիաների դերը որակյալ պրոդուկտ ստեղծելու գործում,
• ֆինանսական ոլորտի թվայնացումը՝ բաց բանկինգ, բաց ֆինանսներ, կենսաչափական նույնականացում,
• AI-գործակալների և բազմագործակալ համակարգերի կիրառումը ֆինանսական գործընթացների ավտոմատացման մեջ,
• վճարային ոլորտի հիմնական միտումները, էլեկտրոնային առևտրի զարգացումը,
• կրիպտոարժույթների և բլոկչեյնի ոլորտում անվտանգությունն ու AML կարգավորումը։

Այսօր ֆինանսական ոլորտը գտնվում է ոչ միայն թվայնացման փուլում, այլև խորը կառուցվածքային վերափոխման գործընթացում։ Փոխվում են ոչ միայն տեխնոլոգիաները, այլև ֆինանսների ամբողջ տրամաբանությունը», — նշեց Յունիբանկի Վարչության նախագահ Մեսրոպ Հակոբյանը։ Նրա խոսքով՝ տեխնոլոգիաներն արդեն սկսում են որոշել մրցունակությունը։ Արհեստական բանականությունն ու ավտոմատացումը այլևս միայն արդյունավետության հարց չեն, այլ բանկերի, վճարային համակարգերի և ամբողջ ֆինանսական ենթակառուցվածքի երկարաժամկետ զարգացման կարևորագույն գործոններ։

Նշվեց նաև, որ Յունիբանկը առաջինն էր Հայաստանում, որ գործարկեց արհեստական բանականության վրա հիմնված վարկային սքորինգ անգրավ վարկերի համար, ինչը թույլ տվեց ավելի արագ և արդյունավետ մշակել մեծ թվով վարկային հայտեր։

Մեսրոպ Հակոբյանն ընդգծեց, որ FINTECH360-ի նման հարթակները ստեղծում են շուկայի մասնակիցների միջև երկխոսության միջավայր, ինչպես նաև հնարավորություն են տալիս զարգացնել գործընկերությունը, փոխանակվել փորձով և բացահայտել տարածաշրջանային աճի նոր ուղղություններ։

Հագեցած գործարար ծրագրից հետո FINTECH360-ի մասնակիցները մեկնեցին Գառնի և Գեղարդ, ինչպես նաև գինեգործարան, որտեղ կազմակերպվել էր հայկական գինիների համտես։