Ետ չեն եկել և չեն փոխել եկեղեցու դռների փականները․ Տեր Արտաշեսը՝ սպառնալիքների մասին

Վեդիի համայնքապետ Գարիկ Սարգսյանի հովանու ներքո գործող փոխքաղաքապետ Նշան Հովհաննիսյանը, որը հանդիսանում է նաև Ոսկետափ բնակավայրի վարչական ղեկավար, 2 օր է, ինչ խիստ զբաղված է:

Երեկվանից փորձում ենք իրենից ճշտել, թե ի՞նչ եղավ, ու՞ր գնացին և չվերադարձան նա և Ոսկետափի եկեղեցու բարերարը, ովքեր քահանային սպառնացել էին, որ մեկ ժամ հետո գալու են և փոխեն եկեղեցու դռների փականները, միգուցե փոշմանե՞լ են: Սակայն երեկ 24News-ի զանգին ի պատասխան Հովհաննիսյանը ասաց, որ աշխատանքային ժամ է և անջատեց:

Փորձեցինք այսօր` ոչ աշխատանքային օրով կապ հաստատել Ոսկետափի վարչական ղեկավարի հետ. «Ոչ աշխատանքային օր ա, բայց հիշատակի օր ա, պանթեոնում եմ հիմա»,- ասաց Վեդու փոխքաղաքապետն ու հապշտապ անջատեց հեռախոսը:

24News-ի հետ զրույցում Մասյացոտնի թեմի Սուրբ Սահակ–Մեսրոպ եկեղեցու հոգևոր հովիվ Տեր Արտաշես քահանա Հակոբյանը, որին և սպառնացել էին, ասաց, որ իրավիճակը հանգիստ է, ետ չեն եկել և չեն փոխել եկեղեցու դռների փականները:

Հիշեցնենք, որ նախորդ շաբաթ օրը Մասյացոտնի թեմը հայտարարություն էր տարածել որ Ոսկետափում շարունակվում են ճնշումները Սուրբ Սահակ–Մեսրոպ եկեղեցու հոգևոր հովիվ Տեր Արտաշես քահանա Հակոբյանի նկատմամբ։ Նման գործողությունները թեմը որակել է անօրինական և անթույլատրելի միջամտություն Հայաստանյայց Առաքելական Սուրբ Եկեղեցու ներքին կյանքին և հոգևորականների ծառայությանը։

Մերի Մանուկյան