Կոնվերս Բանկը IV Conference Capital Markets Armenia-ում ներկայացրել է իր փորձը

Բիզնեսում երկարաժամկետ ներդրումների և այս նպատակով պարտատոմսերի թողարկումների կարևորությունը քննարկման առանցքային թեմաներ են դարձել IV Conference Capital Markets Armenia միջազգային համաժողովի շրջանակում:

Կոնվերս Բանկի Կորպորատիվ և ներդրումային բանկային ծառայությունների բաժնի պետ Էլեն Քարիմյանը հանդես է եկել «Տնտեսության իրական հատվածի մուտքը կապիտալի շուկա. իմաստը, փորձառությունը և հեռանկարները» թեմայով խոսնակ և ներկայացրել ՀՀ կապիտալի շուկայի զարգացման տեսլականը B2B և B2C տեսանկյուններից:

ՀՀ կապիտալի շուկայում պարտատոմսերի ամենամեծ մասնաբաժինն ունեն բանկերը, և սա արդեն ձևավորված սեգմենտ է, սակայն շուկայի ներուժը և զարգացման հաջորդ կարևոր քայլը տնտեսության իրական սեկտորի մուտքն է այս շուկա: Սպառողներին ծանոթ անուն ունեցող թողարկողների պարտոմսերն առավել մեծ հետաքրքրություն են առաջացնում հենց ֆիզիկական անձ ներդրողների շրջանակում: Եվ ֆիզիկական անձի առաջին փորձնական ներդրումը դառնում է նեդրումային մշակույթ՝ փոքր ներդրումներով դեպի պորտֆելի ձևավորում: 

Կապիտալի շուկային անհրաժեշտ են նոր թողարկողներ, նոր անուններ:

Էլեն Քարիմյանն ասել է. «Կարևոր է նաև նշել, որ ընկերությունների թողարկումներով միջոցների ներգրավումը ոչ թե բանկային վարկերի այլընտրանք է, այլ ռազմավարական լրացում: Միջոցների ներգրավման հենց կոմբինացված տարբերակն է ապահովում ընկերության կայուն ֆինանսական մոդելը: Պարտատոմսերի թողարկումն ընկերության համար միաժամանակ նաև իր ծառայություններից, ապրանքներից օգտվող հաճախորդների թվի ավելացնումն է և լոյալության բարձրացումը»:

Միջոցառմանը մասնակցել և պարտատոմսերի թողարկման, տեղաբաշխման հարցում Կոնվերս Բանկի հետ արդյունավետ համագործակցության փորձն են ներկայացրել Գլոբբինգը և Վարդանանց բժշկական կենտրոնը: