Աշխատանքային այց Վայոց ձոր. Արամ Ղազարյանը հանդիպել է հրշեջ-փրկարարներին, տվել է հանձնարարականներ

ՆԳՆ Փրկարար ծառայության տնօրեն-ՆԳ նախարարի տեղակալ Արամ Ղազարյանն ապրիլի 1-ին այցելել է Վայոց ձորի մարզային փրկարարական վարչության Ջերմուկի, Վայքի և Եղեգնաձորի հրշեջ-փրկարարական ջոկատներ:

Արամ Ղազարյանը ծանոթացել է ստորաբաժանումների շենքային պայմաններին, տեխնիկական հագեցվածությանն ու ահազանգերին օպերատիվ արձագանքելու մարտավարությանը։

Արամ Ղազարյանը հանձնարարել է ստորաբաժանումների գործունեությունը համապատասխանեցնել Փրկարար ծառայության որդեգրած նոր ռազմավարական մոտեցումներին՝ կարևորելով արդի մարտահրավերներին հակազդելու պատրաստականության և աղետների ռիսկի կառավարման համակարգված, թիրախային միջոցառումների անհրաժեշտությունը։

Այցի ընթացքում Փրկարար ծառայության տնօրենը հետևել է նաև Եղեգնաձորի հրշեջ-փրկարարական ջոկատի վարչական նոր շենքի շինարարական աշխատանքների ընթացքին։

Աշխատանքային խորհրդակցության ընթացքում Արամ Ղազարյանն անդրադառնալով անձնակազմի մասնագիտական հմտությունների կատարելագործմանը՝ ընդգծել է տեսական գիտելիքների և գործնական վարժանքների շարունակականության կարևորությունը: Նա վստահեցրել է, որ փրկարարական ստորաբաժանումների մրցունակությունը հիմնված է կուտակված փորձի պարբերական վերլուծության և նորարարական մեթոդների կիրառման վրա, ինչն ուղղակիորեն նպաստում է բարդ իրավիճակներում ճիշտ և արագ կողմնորոշվելուն։

Բարձր գնահատելով անձնակազմի կարողություններն ու մասնագիտական պատրաստվածությունը՝ Փրկարար ծառայության տնօրենը շնորհակալություն է հայտնել կատարված ծավալուն աշխատանքի համար։