Էկոնոմիկայի նախարարությունում հնչած կրակոցի դեպքի առթիվ նախաձեռնվել է քրեական վարույթ

Էկոնոմիկայի նախարարությունում ապրիլի 6-ին հնչել էր կրակոց: 24News-ին Քննչական կոմիտեից հայտնեցին, որ դեպքի առթիվ նախաձեռնվել է քրեական վարույթ՝ Քրեական օրենսգրքի 167-րդ հոդվածի 2-րդ մասի 8-րդ կետով (առողջությանը միջին ծանրության վնաս պատճառելը՝զենքի կամ մարմնական վնասվածք պատճառելու համար նախապես պատրաստված կամ հարմարեցված առարկայի կամ միջոցի գործադրմամբ)։

Կատարվում է նախաքննություն։

Ավելի վաղ Ներքին գործերի նախարարությունից հայտնել էին, որ ՆԳՆ 112 օպերատիվ կառավարման կենտրոն հաղորդում է ստացվել, որ շտապօգնության խումբը «ձախ սրունքի առաջային մակերեսի հրազենային վիրավորում» ախտորոշմամբ բուժօգնության է տեղափոխել մի անձի։

Նախնական տվյալներով, ՀՀ էկոնոմիկայի նախարարության մասնավոր պահնորդական ընկերության աշխատակիցը հերթափոխի ընդունման-հանձնման ժամանակ իրեն ամրակցված զենքից պատահական կրակոց է արձակել ինքն իրեն։

Տեղափոխվածի առողջական վիճակը գնահատվում է բավարար։

Հասմիկ Սարգսյան