Բաքվում այս պահին ունենք 41 դատապարտված ռազմագերի. ԿԽՄԿ ներկայացուցիչները տեսակցում են նաեւ դատապարտված հայորդիներին

Կարմիր խաչի միջազգային կոմիտեի հաղորդակցման ծրագրերի ղեկավար Զառա Ամատունին «Փաստինֆո»-ին հայտնել է՝ որպես չեզոք միջնորդ, շարունակում են պարբերական այցերը Ադրբեջանում պահվող հայ ռազմագերիներին և քաղաքացիական անձանց: Ադրբեջանում գտնվող հայ գերիների վերաբերյալ վիճակագրական տվյալ Կարմիր խաչի միջազգային կոմիտեն չի հրապարակում:

«ԿԽՄԿ ներկայացուցիչների հերթական այցի շարքը հայ գերեվարված անձանց Ադրբեջանում տեղի է ունեցել հունիսի վերջին, հուլիսի սկզբին»։

Ամատունին տեղեկացրեց, որ այս այցերի շրջանակում ևս հնարավորություն է տրվել բոլոր գերեվարված հայերին կապ հաստատել՝ տեսաուղերձներ ձայնագրել իրենց ընտանիքների համար, ինչպես նաև կատարել հեռախոսազանգեր, օգտվել նաև նամակներ գրելու հնարավորությունից:

ԿԽՄԿ ներկայացուցիչները տեսակցում են նաև անձանց, որոնք դատապարտվել են Ադրբեջանի օրենսդրությամբ։ Որպես միջազգային մարդասիրական կազմակերպություն գերեվարված անձանց տարբերություն չի դրվում՝ շարունակում են տեսակցությունները՝ անկախ նրանից՝ երկրում ինչ կարգավիճակում են գտնվում։

«Անկախ նրանց կարգավիճակից՝ ռազմագերի են, գերեվարված քաղաքացիական անձինք, կամ տեղի օրենքներով դատապարտված, նրանք շարունակում են պաշտպանված լինել միջազգային իրավունքի պաշտպանության ներքո, ինչը թույլ է տալիս մեր մանդատը կիրառելու այդ մարդկանց հանդեպ»։

Հուլիսի 3-ին 15 հայ գերիների վերադարձից հետո Ադրբեջանն այժմ հաստատում է 45 անձի գերության փաստը: Պատերազմից հետո Ադրբեջանից Հայաստան է վերադարձել 103 գերի, նաև Բեյրութ է վերադարձել լիբանանահայ Մարալ Նաջարյանը։ Ոչ պաշտոնական տվյալներով՝ Բաքվում շարունակում են մնալ 100-ից ավելի մեր հայրենակիցներ։

Բաքվում հուլիսի 22-ից հետո 39 հայորդի դատապարտվել է 6-ական տարվա, երկուսը՝ 15-ական տարվա ազատազրկման։