«Մետրոպոլիտենում թերհավաքագրում չկա, կեղծ նարատիվներ մի՛ ստեղծեք», «ավտոբուսների մասով թերհավաքագրումը 3 մլրդ դրամ է». քննարկում` քաղաքապետարանում

Երևանի քաղաքապետարանի գործակարգավարական խորհրդակցության ժամանակ եկամուտների հաշվառման և գանձման վարչության պետ Դավիթ Հակոբյանը ներկայացրեց Երևան քաղաքի սեփական եկամուտների 2025 թվականի պլանային առաջադրանքների վերաբերյալ ցուցանիշները՝ հունիսի 30-ի դրությամբ։

Նրա խոսքով՝ 2025 թվականի հունվարից հունիս ամիսների համար պլանավորված 45 միլիարդ 108 միլիոն 792 հազար 300 դրամ սեփական եկամուտներից փաստացի հավաքագրվել է 39 միլիարդ 939 միլիոն 589 հազար 200 դրամ, կատարողականը՝ 88.5%, թերակատարումը՝ շուրջ 5 միլիարդ դրամ։

Նա նշեց, որ թերակատարման հիմնական պատճառ է հանդիսացել փոխադրավարձի՝ ներառյալ մետրոպոլիտենի հավաքագրված այդ շուրջ երեք միլիարդ դրամը։

Քաղաքապետ Տիգրան Ավինյանը նշեց, որ չպետք է ստեղծել կեղծ նարատիվներ. «Պարոն Հակոբյան, եկեք չստեղծենք այսպես ասած՝ կեղծ նարատիվներ։ Մետրոպոլիտենինը թերհավաքագրում չի, այստեղ շատ կարևոր է հստակություն մտցնել։ Մետրոպոլիտենինն ուղղակի մեր բյուջեով նախատեսվածը քաղաքապետարանի բյուջե չի եկել, ուղիղ մետրոպոլիտեն է գնացել և մետրոպոլիտենում էլ մնացել է։ Այդ տարբերության մեջ թերհավաքագրումը որքա՞ն է»,- հարցրեց Ավինյանը։

Հակոբյանը նշեց, որ ընդհանուր թերակատարումը փոխադրավարձով՝ հաշվի առնելով այդ հանգամանքը, կազմել է 3 միլիարդ դրամ։ «Ըստ էության, ավտոբուսի մասով է փոխադրավարձի թերհավաքագրում եղել»,- ասաց նա։

Ի պատասխան՝ Ավինյանն ասաց. «Հաջորդ քայլով մենք պետք է աշխատենք մեր փոխադրամիջոցներում հավաքագրումն էականորեն բարելավելու վրա։ Մենք օրենսդրություն արդեն ունենք, ակնկալվում է, որ դուք շուտով կներկայացնեք աշխատանքային ձեր ծրագիրը՝ թե ինչպես ենք անում, որպեսզի արագ անցնենք ավելի բարձր արդյունավետությամբ հավաքագրման»։