«Չի կարելի դադարել սովորել, երբ հասնում եք ձեր կարիերայի թվացյալ բարձունքին, շարունակեք ինքնակրթվել»․ Պոլիտեխնիկն այս տարի 935 շրջանավարտ ունի
«Պոլիտեխնիկական համալսարանը վերջին 4 տարիներին էական փոփոխություն է կրել եւ ձեւի, եւ բովանդակության իմաստով։ Մենք տեսնում ենք, թե ինչ արագ տեմպերով է փոխվում համալսարանը, ինչ արագ տեմպերով է փոխվում այն բովանդակությունը, որն այս պատերի ներսում փոխանցում են ձեզ»,- Հայաստանի Ազգային Պոլիտեխնիկական համալսարանի 92-րդ շրջանավարտների ավարտական հանդիսավոր հոբելյանական երեկոյի ժամանակ ուսանողներին ու շրջանավարտներին դիմեց բուհի հոգաբարձուների խորհրդի անդամ, Երեւանի քաղաքապետ Տիգրան Ավինյանը։
Նրա խոսքով՝ վերջին տարիներին էականորեն բարելավվել են բուհի ֆակուլտետների նյութատեխնիկական պայմանները, ձեռք են բերվել ժամանակակից սարքավորումներ, ամրապնդվել կապերը միջազգային գործընկերների հետ։ «Արդյունքում՝ այսօր Հայաստանի Պոլիտեխնիկական համալսարանի շրջանավարտն այն մարդն է, ով կարող էիր գիտելիքը վերածել արդյունքի»,- ասաց Ավինյանը։
Պոլիտեխնիկական համալսարանի ռեկտոր Գոռ Վարդանյանի տեղեկացմամբ՝ այս տարի 935 ուսանող է ավարտում բուհը։ «Ճանապարհ ենք դնում 935 բարձրագույն տեխնոլոգիական կրթություն ստացած շրջանավարտի, անձանց, ովքեր պետք է վերցնեն իրենց ձեռքերում ՀՀ տեխնոլոգիական կրթության, տեխնոլոգիական գիտության ապագան, տեխնոլոգիական կրթության հենքի վրա ստեղծվող մասնավոր ոլորտի ապագան։ Մենք հավատում ենք ձեզ, աջակցում ենք ձեզ, մենք ձեր կողքին ենք։ Այսօր ներկայացել ենք այս կազմով՝ եւս մեկ անգամ հաստատակամ ասելու, որ Պոլիտեխնիկի ավագ սերնդի ներկայացուցիչները, Պոլիտեխնիկի բարերարներն ու բարեկամները ձեր կողքին են, ձեզ աջակցում ու առաջնորդում են։ Դուք այլ տարբերակ չունեք, քան լինել համարձակ, որովհետեւ այս տարիների ընթացքում դուք ստացել եք մրցունակ կրթություն»,- նշեց ռեկտորը։
Պոլիտեխնիկի 92-րդ սերնդի շրջանավարտների ավարտական երեկոյին հատուկ մոտիվացիոն ելույթով հանդես եկավ Զանգեզուրի պղնձամոլիբդենային կոմբինատի կայուն զարգացման գծով տնօրեն, պոլիտեխնիկի շրջանավարտ Արմեն Ստեփանյանը։ Նա ոչ միայն հաջողակ ղեկավար է երկրի ամենախոշոր արդյունաբերական կառույցներից մեկում, այլ նաեւ պոլիտեխնիկյան համայնքի շրջանավարտ, որը հավատարիմ է իր կրթական արմատներին։
«Այսօրվանից այնպիսի հիմք է դրված, որը ձեր ապագա կյանքի ու կարիերայի, ինչո՞ւ ոչ, նաեւ ձեր անձնական կյանքի համար կարեւոր է։ Ուզում եմ շնորհավորել նաեւ մեզ՝ շրջանավարտներիս, որովհետեւ այսօր մեր համայնքը հարստացավ, եւս 935 հոգի համալրեց մեր բանակը»,- ասաց նա։ Արմեն Ստեփանյանի խոսքով՝ գաղտնիք չէ, որ հանքարդյունաբերությունն այսօր ՀՀ-ում շարժիչ ուժ է։ Եվ հենց այս բուհն է որակյալ կադրերով ապահովում ոլորտը։ «Կա կարծրատիպային մտածելակերպ, թե Պոլիտեխնիկում, բացի տեղեկատվական տեխնոլոգիաներից, մնացած բոլոր մասնագիտությունները ոչ պոպուլյար եւ ոչ մոդայիկ են, օրինակ, քիմիա, լեռնային գործ։ Բայց ես ուզում եմ վստահեցնել, որ հենց այդտեղ է, որ որակյալ կադրերի մեծ պահանջարկ կա։ Իմ անձնական փորձով կարող եմ ասել՝ եթե կայանում ես այդ ոլորտում, ապա արտասահմանում էլ ձեզ վրա կարող են ուշադրություն դարձնել։ Միայն Զանգեզուրի պղնձամոլիբդենային կոմբինատում աշխատում են մեր սիրելի բուհի 600-ից ավելի շրջանավարտներ։ Ես ձեզ վստահեցնում եմ, որ առաջին հայացքից ոչ մոդայիկ համարվող մասնագիտություններն իսկապես այսօրվա աշխարհում ունեն մեծ պահանջարկ։ Ես ինքս քիմիական ֆակուլտետի շրջանավարտ եմ»,- նշեց նա։
Արմեն Ստեփանյանը Պոլիտեխնիկական համալսարանի շրջանավարտներին հետեւյալ խորհուրդը տվեց․ «Չի կարելի դադարել սովորել, անընդհատ պետք է ինքնակրթվել։ Եվ ամենակարեւորը՝ երբ հասնում եք ձեր կարիերայի թվացյալ բարձունքին, դա հենց ամենակարեւոր պահն է, երբ անընդհատ պետք է շարունակել ինքնակրթվել։ Չդավաճանեք այն արժեքները, որոնք այս պատերը մեզ տալիս են։ Սա այն բուհն է, որը մեզ միավորում է որոշակի արժեքներով, այստեղ մի մեծ արժեքային համակարգ է ձեւավորվում, որն ամբողջ կյանքում ձեզ հետապնդում է։ Եվ հիշեք մի կարեւոր բան, որ անփոխարինելի մարդ չկա, դա շատ կարեւոր է։ Մենք բոլորս անհամբեր սպասում ենք՝ ձեզ տեսնել այլ կարգավիճակում՝ մեր գործընկերների կարգավիճակում, ինչու չէ, ապագայում մենք ուզում ենք ձեզ տեսնել որպես մեր ղեկավարներ»,- ասաց Ստեփանյանը։
ԿԳՄՍ նախարարի տեղակալ Արթուր Մարտիրոսյանի խոսքով՝ բուհը տարեցտարի դառնում է ավելի գրավիչ ուսանողների համար, որի շնորհիվ աստիճանաբար, բայց հաստատուն քայլերով փորձում է բարելավել իր դիրքերը միջազգային կրթական համակարգում։
Երեկոյի ընթացքում տեղի ունեցավ նաեւ դիպլոմների հանձնման, պարգեւների եւ պատվավոր կոչումների շնորհման արարողություն։ Պոլիտեխնիկական համալսարանում շուրջ 5 տասնամյակ գիտամանկավարժական աշխատանք իրականացրած Ռուբեն Աղգաշյանը բուհի պատվավոր պրոֆեսորի կոչմանն արժանացավ։ Դիմելով բուհի շրջանավարտներին՝ Ռուբեն Աղգաշյանն ասաց․ «Հիշեք մի բան՝ պոլիտեխնիկցի լինելը շատ պատվավոր է, բայց միաժամանակ շատ պատասխանատու բեռ եք վերցրել ձեզ վրա։ Համալսարանը միշտ ձեր կողքին է, եւ մենք էլ ուզում ենք, որ դուք լինեք համալսարանի կողքին՝ ձեր ողջ կյանքի ընթացքում»։
Սամվել Բաբայանի և Արթուր Վանեցյանի քաղաքական համագործակցությունը դադարեցվել է․ «Հրապարակ»
«Կարամ հիմա էլ հրաժարվեմ, մանդատ նե տակ դառագոյ». Սասուն Միքայելյանը՝ Փաշինյանին. «Հրապարակ»
Բաքվի բենզինը ՀՀ-ում վաճառվում է բավականին արագ տեմպերով. սա ցուցիչ է հասարակական դեգրադացիայի
Հայկ Կոնջորյանին հարց տալու համար լրագրողները զրկվել են ԱԺ հավատարմագրից. «Ժողովուրդ»
Արգելել են մոտենալ ՔՊ–ականների տներին. «Արգելք կա, որ պատգամավորներին չծեծեմ». «Հրապարակ»
Իմ տեղեկություններով ԱՄՆ-ից սպասվում է չափազանց բարձրաստիճան պաշտոնյայի այց
31-ամյա վարորդը ոչ սթափ վիճակում վրաերթի է ենթարկել հետիոտնին. վերջինը տեղափոխվել է հիվանդանոց
Մենք ճաղերի տարբեր կողմերում ենք ու իրականում պարզ էլ չէ՝ ճաղերի ո՛ր կողմում է բանտը․ Մելիքյան
Բաքվի «դատարանում» գտնվող Դավիթ Բաբայանը եզրափակիչ ելույթում իրեն մեղավոր չի ճանաչել
ՔՊ նախընտրական ցուցակում չի լինի նաև Փաշինյանի նախկին օգնական Նաիրի Սարգսյանը