Սամվել Կարապետյանի կալանքի վերաբերյալ բողոքի քննությունն իրականացվում է գրավոր ընթացակարգով

Գործարար, բարերար Սամվել Կարապետյանի՝ շուրջ 80 օր շարունակվող կալանքի ակնհայտ ապօրինի և սնանկ լինելու վերաբերյալ վերաքննիչ բողոքի քննությունը պարզ չէ ինչու, բայց իրականացվում է գրավոր ընթացակարգով, իսկ դատական ակտի հրապարակման օրն է սեպտեմբերի 8-ը, այս մասին հայտարարել է Սամվել Կարապետյանի փաստաբանական խմբի անդամ Արամ Վարդևանյանը։

«2025 թվականի հունիսի 17-ին գործադիր իշխանության ղեկավարի կողմից կատարվեց հետևյալ ֆեյսբուքյան գրառումը. «Հիմա ես քեզ իմ ձևով կմիջամտեմ…»: Այս արտահայտությունն ակնհայտ էր, որ ուղղված էր կոնկրետ անձի և այդ արտահայտությունից ժամեր անց գործարար, բարերար Սամվել Կարապետյանն ակնհայտ ապօրինի կերպով կալանավորվեց և մինչ օրս կալանավորված է:

Մասնագիտական հանրույթից յուրաքանչյուրին կարելի է հարցնել՝ «Մենք մեր ձևով կմասնակցենք Եկեղեցու պաշտպանությանը» արտահայտությունը կարո՞ղ է քրեական վարույթ նախաձեռնելու առիթ հանդիսանալ, կամ, առավելևս, անձի կալանքի պայմանը բավարարե՞լ, թե՞ ոչ: Այս հարցերն ունեն միանշանակ պատասխաններ.

1) օրինական չէ քրեական վարույթը,

2) քրեական օրենսգրքի հատուկ մասի որևէ հոդվածի հետ չկա որևէ առնչություն,

3) ակնհայտ անօրինական է կալանքը:

Այս միանշանակ պատասխանների իրացման խոչընդոտը հունիսի 17-ի հայտնի հայտարարությունն է: Հենց դրանում է Սամվել Կարապետյանի նկատմամբ քաղաքական հետապնդման անվիճելիությունը, հենց դրանում է վրեժխնդրությունը և կալանքը որպես պատիժ իրացումը իրավապահների կողմից՝ չնայած ակնհայտ և տարբեր տեղական, միջազգային պարտավորություններին, որոնք դա ուղիղ արգելում են:

Շուրջ 80 օր շարունակվող կալանքի ակնհայտ ապօրինի և սնանկ լինելու վերաբերյալ վերաքննիչ բողոքի քննությունը պարզ չէ ինչու, բայց իրականացվում է գրավոր ընթացակարգով, իսկ դատական ակտի հրապարակման օրն է՝ սեպտեմբերի 8-ը»,- նշել է Վարդևանյանը։