ԶԼՄ-ները չեն կարողանա դատական նիստը լուսաբանել մինչև քրգործով անցնող բոլոր վկաները չհարցաքննվեն

Արդարադատության նախարարությունը հանրային քննարկման է ներկայացրել նախագիծ։ Առաջարկվող փոխություններով և լրացումներով վերացվում են գործնականում ի հայտ եկած իրավական անորոշությունները և անհստակությունները, հստակեցվում են պետական գաղտնիք պարունակող քրեական վարույթներով վարութային գործողությունները ամրագրելու եղանակները, լրացվում են քրեական վարույթների անջատման կանոնները, նախատեսվում է հոգեբանին բացարկելու, գրավադրված անշարժ գույքը համարժեք այլ գույքով կամ դրամական գումարով փոխարինելու հնարավորություն, հսկող դատախազի կողմից քրեական հետապնդում չհարուցելու կամ այն դադարեցնելու մասին որոշոման կայացման համար  նախատեսվում է յոթնօրյա ժամկետ։

«Հայաստանի Հանրապետության քրեական դատավարության օրենսգրքում փոփոխություններ և լրացումներ կատարելու մասին» Հայաստանի Հանրապետության օրենքի նախագծում մի շարք փոփոխություննեև են առաջարկվում։

Ի թիվս այլ փոփոխությունների, առաջարկվում է օրենքի 267-րդ հոդվածը լրացնել նոր խմբագրությամբ 1.1.-ին մասով, որով դատական նիստի տեսաձայնագրումը չի կարող տարածվել, դրա ընթացքի հեռարձակում, այդ թվում՝ ուղիղ հեռարձակում չի կարող իրականացվել մինչև տվյալ քրեական գործով ներգրավված և դատական նիստին կանչված բոլոր վկաների հարցաքննության ավարտը։ Ստացվում է, որ դատական նիստերի լուսաբանումը սահմանափակվում է։

Նշենք, որ  267-րդ հոդվածը սահմանում է դատական նիստի դռնբացությունը։ Ըստ հոդվածի 1-ին մասի՝  դատական նիստին ներկա անձինք իրավունք ունեն կատարելու գրառում, իսկ դռնբաց դատական նիստին ներկա անձինք` նաև ձայնագրելու իրավունք:

Դատական նիստի ընթացքի տեսագրումը, տեսաձայնագրումը, լուսանկարումը կամ հեռարձակումը թույլատրում է դատարանը` մեղադրյալի համաձայնությամբ: Մեղադրյալի համաձայնության դեպքում դատական նիստի ընթացքի տեսագրումը, տեսաձայնագրումը, լուսանկարումը կամ հեռարձակումը կողմերի կարծիքը լսելուց հետո դատարանի որոշմամբ կարող է արգելվել, եթե դա է պահանջում արդարադատության շահը:

Լրատվության միջոցների մասնակցությունը դատական նիստին դատարանի որոշմամբ կարող է արգելվել, եթե անհրաժեշտ է ապահովել՝

1) մասնավոր կամ ընտանեկան կյանքի գաղտնիությունը.

2) անչափահասի լավագույն շահի պաշտպանությունը.

3) վարույթին ներգրավված անձի կամ նրա մերձավորի անվտանգությունը.

4) պետական, ծառայողական կամ օրենքով պահպանվող այլ գաղտնիքի պաշտպանությունը:

Նախագծի հիմնավորման մեջ նշվում է նաև, որ նախագծի ընդունման արդյունքում կլավարկվեն ՀՀ քրեական դատավարության օրենսգրքով նախատեսված որոշ իրավակարգավորումներ:

Հասմիկ Սարգսյան