Ռուբենի դեպքը ցույց է տալիս, որ փաստաբանական ողջ համայնքն է վտանգված. փաստաբան

Փաստաբան Ռուբեն Մխիթարյանի ձերբակալությունը միանգամայն ապօրինի էր ։ Այս մասին մամուլի ասուլիսում հայտարարել է նրա փաստաբան Լիանա Գասպարյանը։

Փաստաբանը նշել է, որ Շիրակի դատարանն անօրինական կերպով ձերբակալել է Ռուբեն Մխիթարյանին՝ իր մասնագիտական ​​պարտականությունները կատարելիս։ «Նա մեկ ամիս անցկացրել է անօրինական կալանքի տակ։ Նոյեմբերի 18-ին դատավոր Ռուբեն Ռշտունու արդար դատական ակտի շնորհիվ նա ազատ է արձակվել». փաստաբանը հատուկ շնորհակալություն է հայտնել դատավորին, ում արդարադատությունը հեռախոսակապի կամ SMS հաղորդագրությամբ չէ իրականացվել:

«Ռուբենի դեպքը ցույց է տալիս, որ փաստաբանական ողջ համայնքն է վտանգված, և փաստաբանները չեն լռելու, մշտապես պայքարել ենք և  պայքարելու ենք իրական արդարադատության համար», - ընդգծել է Լիանա Գասպարյանը։

Հիշեցնենք, որ Մխիթարյանը ձերբակալվել էր այն բանի համար, որ հոկտեմբերի 20-ին ներկա է եղել Գյումրու քաղաքապետարանի դիմացի հրապարակում՝ քաղաքապետ Վարդան Ղուկասյանի ձերբակալության դեմ գյումրեցիների բողոքի ակցիայի ժամանակ։ Լինելով փաստաբան՝ Մխիթարյանը փորձել է հանդարտեցնել մարդկանց և նրանց իրավական օգնություն ցուցաբերել։ Մխիթարյանի գործողություններում իրավապահները քրեական բաղադրիչ են տեսել։